Góðgerðarsamtökin Samferða hafa undanfarin ár staðið að viðburðum víða um land og hefur ágóði runnið óskiptur til einstaklinga og fjölskyldna í neyð. Sá síðasti í ár verður haldinn í Bæjarbíó næstkomandi miðvikudag. Rútur Snorrason heldur m.a. utan um viðburði á vegum samtakanna og við ræddum við hann.

„Við byrjuðum í Hnífsdal og fórum svo til Akureyrar og Vestmannaeyja. Stefnum svo að því að bæta Neskaupstað við á næsta ári og þá náum við að vera í öllum landsfjórðungum,“ segir Rútur og tekur fram að þeim hafi alls staðar verið tekið alveg ótrúlega vel, bæði af tónlistarmönnum og áhorfendum. „Við erum ekki með neina yfirbyggingu og því höfum við treyst algjörlega á samstarfsaðila, sem er algjörlega ómetanlegt, eins og Flugfélagið Erni, Olís og Bílaleigu Akureyrar. Ef þeirra nyti ekki við værum við ekki að fara svona víða um landið. Sama má segja um Palla í Bæjarbíó, þar sem við fáum að vera með viðburðinn. Af virðingu við listamennina viljum við að sjálfsögðu fylla húsið. Allir gefa vinnu sína og enginn kostnaður er við viðburðina og ef það er einhver kostnaður þá tek ég hann á mig.“

Fulltrúar Samferða ásamt tökuliði frá Stöð 2 í umfjöllun um samtökin.

Verða vonandi fastir liðir

Rútur segir að bæjarblöð og fyrirtæki á hverjum stað þar sem viðburðirnir eru haldnir séu smám saman að taka við sér. „Það tekur tíma að kynnast samtökunum okkar og skilja út á hvað þau ganga. Við erum að gefa heimafólki tækifæri á að koma sér á framfæri, þá bæði ungt og efnilegt fólk að stíga sín fyrstu skref og svo líka stjörnur. Svo eru þetta kjörin tækifæri til að kynna okkur sem samtök og vonandi verða þetta fastir liðir á sem flestum stöðum.“ Þá sé stefnan að vera með heimafólk að skemmta á viðburðunum, í bland frægt fólk frá höfuðborgarsvæðinu. Á næsta ári muni peningur sem safnast verða skilinn eftir fyrir einstaklinga og fjölskyldur í hverjum landsfjórðungi fyrir sig.

100 kall mánaðarlega skiptir sköpum

Einnig sé í bígerð að kynna almennilega fyrir almenningi hvernig samtökin starfi. „Við vinnum fyrst og fremst eftir ábendingum en ekki t.d. umsóknum. Við viljum fá fólk með okkur í að láta vita af fólki í neyð sem er ekkert endilega að trana sér fram eða vekja athygli. Það skiptir gríðarlegu máli,“ segir Rútur og að þótt mikið sé að gera sé ofboðslega gefandi að standa í þessu. „Við erum með hugmynd í vinnslu um að fólk geti t.d. styrkt okkur um 100 kall mánaðarlega. Það munar litlu fyrir hverni og einn er er svo fljótt að koma ef margir taka þátt á landsvísu.“

Hægt er að styrkja samtökin beint í 327-26-114, kt. 651116-2870 og einnig með því að hringja eða senda sms í 907-1081 (1000 kr), 907-1083 (3000 kr), 907-1085 (5000 kr) og 907-1090 (10.000 kr).