Dagana 4. og 5. janúar 2019 verður haldin keppni í töfrateningnum (Lights of Reykjavík 2019) í Flensborgarskólanum í Hafnarfirði. Þrjátíu keppendur frá 7 löndum hafa skráð sig til leiks og keppt verður í 14 mismunandi greinum.

Hver man ekki eftir töfrateningnum sem sló í gegn um allan heim í upphafi níunda áratugs síðustu aldar? Frá þeim tíma hafa verið seldar meira en 350 milljónir eintaka og enn eru áhugasamir um allan heim á öllum aldri að spreyta sig á upphaflega teningnum (Rubiks Cube 3×3) og ótrúlegri flóru annara sambærilegra teninga af öllum stærðum og gerðum.

Mótið er alþjóðlega viðurkennt og undir verndarvæng alþjóðlega töfrateningssambandsins (World Cube Association).

Búast má við spennandi keppni og að bæði íslandsmet og jafvel evrópumet verði
slegin en öflugir keppendur eru skráðir til leiks. Fjölbreytt dagskrá er báða dagana frá 09:00-18:00 og er m.a. keppt í því að leysa 3×3 kubba blindandi. Mótinu lýkur laugardaginn 5. janúar kl. 18:30 með verðlaunaafhendingu.

Aðgangur er ókeypis.

Vinsældir töfrateningsins eru mjög vaxandi hér á landi og má búast við skemmtilegri og spennandi keppni.

Stjórnendur mótsins eru Rúnar Gauti Gunnarsson, Clément Cherblanc og Danival
Heide Sævarsson.