Árlegt eldvarnaátak slökkviliðsmanna hófst í Lækjarskóla í Hafnarfirði í dag og stendur það fram í byrjun aðventu. Slökkviliðsmenn heimsækja nemendur í 3. bekk grunnskóla um allt land og fræða þá um eldvarnir. Nemendur í Lækjarskóla fengu slíka heimsókn í dag og brá bæjarstjórinn, Rósa Guðbjartsdóttir, sér í slökkviliðsbúning af því tilefni. Hafði hún á orði að hann væri töluvert þyngri en hana grunaði, bæði jakkinn og hjálmurinn.

Í framhaldi af kynningu á vegum LSS og spjalli um eldvarnir var eldvarnarkerfið sett af stað og nemendur og starfsmenn komu sér fyrir á söfnunarsvæði á skólalóðinni. Skólastjóranum, Önnu Björnýju Arnardóttur, bjargað af 2. hæð úr „eld og reyk“.  Starfsfólki skólans var svo boðið að spreyta sig á að slökkva eld með slökkvitæki. Að lokum bauðst nemendum að skoða dælubíl og sjúkrabíl SHS.

Myndir/OBÞ