Óskað er eftir hugmyndum að dagskrá Bjartra daga en menningarhátíðin verður haldin dagana 18.-22. apríl í tengslum við Sumardaginn fyrsta eins og undanfarin ár.

Bjartir dagar er þátttökuhátíð og byggir á því að stofnanir, félagasamtök, fyrirtæki og einstaklingar taki þátt í að skapa viðburði um allan bæ sem tengjast hátíðinni eða taki þátt í þeim dagskrárliðum sem aðrir skipuleggja.

Viltu skrá viðburð til þátttöku? Það getur verið eitthvað sem stendur til nú þegar eða eitthvað alveg nýtt, eitthvað risastórt eða minna í sniðum, eitthvað fyrir börn eða eitthvað fyrir fullorðna en allavega eitthvað áhugavert sem hvetur bæjarbúa til virkrar þátttöku.

Til þess að styðja við frumvæðisverkefni verður hluta af fjármagni Bjartra daga, allt að einni milljón, úthlutað til ýmissa verkefna sem fara fram á Björtum dögum. Stofnanir, félagasamtök, fyrirtæki og einstaklingar geta sótt um um fjármagn til verkefna sem fara fram dagana 18.-22. apríl að hámarki 100.000 kr. Beiðni um fjárframlag skal senda verkefnastjóra Bjartra daga á andriom@hafnarfjordur.is fyrir 9. mars og úthlutun verður lokið 16. mars. Við úthlutun verður tekið mið af reglum menningar- og ferðamálanefndar Hafnarfjarðar um styrki til menningarstarfsemi.

Hafnarfjarðarbær heldur utan um almenna skipulagningu og samhæfingu viðburða, stendur að útgáfu dagskrár og kynningu á hátíðinni. Nú er um að gera að leggja höfuðið í bleyti og koma með hugmyndir að dagskrá og senda undirrituðum upplýsingar. Lokafrestur til að senda inn dagskráratriði er 6. apríl.