Ólympíuhlaup ÍSÍ 2018 var sett við Hraunvallaskóla í ljómandi fínu veðri 6. september. Um 800 nemendur skólans tóku þátt í setningunni og gátu valið um að hlaupa 2,5 km, 5 km eða 10 km. Blossi, lukkudýr Smáþjóðaleikanna 2015, var á staðnum til að hvetja nemendur áfram og fór einnig vel á með Blossa og skólastjóranum Lars Imsland. 

Norræna skólahlaupið hefur farið fram í grunnskólum landsins óslitið frá árinu 1984 og lengstan hluta þess tíma verið í umsjón ÍSÍ. Á síðustu árum hefur Ísland verið eina þátttöku-þjóðin á Norðurlöndunum og nafn hlaupsins því ekki endurspeglað verkefnið. ÍSÍ hefur því ákveðið að breyta nafni hlaupsins og heitir það nú Ólympíuhlaup ÍSÍ. Verkefnið hefur nú fengið nýtt merki og viðurkenningaskjölin skarta nýju útliti. Þátttaka íslenskra grunnskólanemenda hefur verið mjög góð og almenn í gegnum árin en hefur náð nýjum hæðum á undanförnum árum. Með Ólympíuhlaupi ÍSÍ er eins og áður leitast við að hvetja nemendur skólanna til þess að hreyfa sig reglulega og stuðla þannig að betri heilsu og vellíðan.
















Myndir/OBÞ