Í 3. bekk í Áslandsskóla eru nemendur búnir að vera duglegir að hreyfa sig í vor, enda heilsueflandi grunnskóli. Á hverjum degi fá þau tækifæri til að fara hring í kringum skólann sinn og stundum marga hringi. Sumir hlaupa en aðrir ganga, hver með sínum hraða. Þetta hefur verið nýtt sem hvatning við lærdóm, en oftar en ekki þarf að klára verkefni til að fá að hlaupa hring. Einnig er náttúruna í nærumhverfinu nýtt og gengið hefur verið nokkrum sinnum á Ásfjall.

Markmið hópsins var að fara vegalengd sem samsvaraði vegalengdinni til Akureyrar. Í fyrra komust þau sem samsvarar vegalengdina til Hvammstanga. Á síðasta skóladegi skólaársins reiknuðu þau vegalengdina sem þau höfðu farið og alls voru það 533 km. Það samsvarar vegalengdinni frá Hafnarfirði og framhjá Mývatni. Markmiðinu var því náð og rúmlega það. Samanlögð vegalengd þessi tvö vor samsvara því vegalengdinni frá Hafnarfirði og til Egilsstaða.

Þau stefna að því að klára hringveginn næsta vetur, en til að það takist ætla þau aldeilis að „bretta upp skálmar“.

Við hjá Fjarðarpóstinum höfum fulla trú á því að þessum duglega hópi takist það!