„Maður á aldrei að halda sér til annars en þess sem er ágætt“ 

Fræðslufundur um Benedikt Gröndal í Bessastaðakirkju, laugardaginn 7. október n.k. kl. 14 – 15.30. Félag áhugamanna um sögu Bessastaðaskóla, Lista og menningarfélagið Dægradvöl og Fugla- og náttúruverndarfélag Álftaness standa að viðburðinum.

Á dagskrá verður tónlist í höndum Ragnheiðar Gröndal og Teits Magnússonar, Guðmundur Andri Thorsson flytur erindið „Af náttúru var ég fúll og einrænn“ og Pétur Gunnarsson „Allt sem ég gerði, það gerði ég út í bláinn“. Kristín Viðarsdóttir, verkefnastjóri hjá Reykjavík Bókmenntaborg UNESCO, kynnir Gröndalshús, fyrrum heimili Benedikts Gröndals, sem var opnað sem menningarhús í júní síðastliðnum. Eftir dagskrána býðst gestum að ganga til Bessastaðastofu og skoða útgefin verk Gröndals og skrifpúlt hans og föður hans, Sveinbjarnar Egilssonar.