Hjónin Valdimar Víðisson og Sigurborg Geirdal og hafa í meira en tvö ár víkkað út þægindaramma sína á nýstárlegan og skapandi hátt. Einu sinni í mánuði gera þau eitthvað saman sem þau hafa ekki gert áður. Þau starfa einnig sama, en Valdimar er skólastjóri Öldutúnsskóla og Sigurborg starfar þar sem kennari. Börn þeirra eru Lilja 30 ára, Elísa 24 ára og Víðir Jökull 11 ára. Einnig eiga þau tvö barnabörn, sem eru 6 ára og 9 mánaða. Valdimar sagði okkur nánar frá þessum uppátækjum og hvaða áhrif þau hafa haft.

Bingó í Vinabæ.

Gengið að Glym.

„Við vorum eitthvað að ræða hvað okkur þætti nú gaman að gera ýmislegt saman og fengum þá þessa hugmynd að setja okkur það sem áramótaheit að prófa eitthvað nýtt í hverjum mánuði. Ákveðið var að við myndum skiptast á að plana eitthvað og fékk hvort okkar sína mánuði. Sá sem á þann mánuð planar eitthvað og hinn fær einungis að vita hvenær það verður og hvernig á að vera klæddur,“ segir Valdimar, en þau bjuggu svo til myllumerkið #nýttíhverjummánuði þar sem þau söfnuðu saman myndum.

Skelfilega lofthræddur í Adrenalíngarðinum

Valdimar segir að þau hjón hafi prófað ansi margt á þessum tíma, enda sé er þetta þriðja árið sem þau haldi þetta höldum þetta áramótaheit. „Við höfum prófað bingó í Vinabæ, golfkennslu, nudd, göngu að Glym, badminton, Adrenalíngarðinn, Go-kart, bílferð í limmó og Pönksafnið svo eitthvað sé nefnt. Ætli skautarnir hafi ekki reynt vel á þar sem Sigurborg er hrikalega hrædd við að skauta og rétt lafði að „skauta“ einn hring með því að halda í barnagrindina. Adrenalíngarðurinn reyndi síðan vel á mig þar sem ég er skelfilega lofthræddur. Þar stóð ég á sveiflandi spýtu í 10m hæð. Merkilega við það er þó að ég skipulagði þann mánuð sjálfur!“ segir hann hlæjandi.

Safn og nýir vinir frá USA.

Planið tók óvænta stefnu

Spurð um hvað sé eftirminnilegast segir Valdimar að erfitt sé að velja á milli, en eitt af því hafi átt sér stað líklega í mars í fyrra. „Þá vorum við með vinum okkar og ég tek fram að þónokkur pör í kringum okkur hafa nú tekið upp þetta áramótaheit. Planið tók óvænta stefnu þegar við hittum fjóra vini frá Bandaríkjunum sem voru að ferðast um landið og vantaði upplýsingar um góða staði í Reykjavík. Þeir enduðu á að fara með okkur út að borða og við sátum allt kvöldið að spjalla við þessa nýju vini okkar um mismunandi menningu landa okkar. Hrikalega skemmtilegt kvöld og svo sannarlega nýtt fyrir okkur.“

Pönksafnið.

Golfkennsla.

Mikið hlegið og minningum safnað

Eðlilega geta þau hjón ekki gefið upp hvað er á stefnuskránni á næstunni en spurð um hvað þetta ferli hefur gert fyrir þau sem einstaklinga og hjón segir Valdimar að það sé eitthvað við það að koma hvort öðru svona á óvart með því að skipuleggja eitthvað skemmtilegt til að gera saman. „Við höfum skemmt okkur vel í hvert einasta skipti, hlegið mikið og safnað yndislegum minningum. Sem einstaklingar þá ýtir þetta okkur oft ansi hressilega út fyrir þægindarammann, sem er hverjum einstaklingi hollt að gera. Við höfum komið okkur sjálfum og hvort öðru á óvart með hvað við getum og reyndar líka hvað við getum síður. Þetta víkkar líka sjóndeildarhringinn að prófa hluti sem manni hefði aldrei dottið í hug að prófa áður,“ segir Valdimar að lokum.

Gokart.

Pool.

Myndir í eigu heiðurshjónanna.