Í kosningum undanfarinna missera hefur mikið verið rætt um stöðugleika.  Þá er oftast vísað til efnahagslegs stöðugleika og hann er sannarlega mikilvægur og til þess fallinn m.a. að verja aukinn kaupmátt.  Þá er efnahagslegur stöðugleiki mikilvægur atvinnulífinu við áætlanagerð og jafnframt grundvöllur þess að heimili og atvinnulíf hafi mátt og þor til að hreyfa sig, vera skapandi og stuðla þannig að nýsköpun, rannsóknum og þróun til framtíðarhagvaxtar.

Stöðugt stjórnarfar

Í komandi kosningum verður kosið um stöðugra stjórnarfar og þar hlýtur traust að skipta öllu máli hverjum treystum við fyrir þeim brýnu verkefnum sem liggja fyrir, að styrkja heilbrigðis, samgöngu, mennta og velferðarmál. Við Framsóknarmenn teljum mikilvægt að nota hluta af ríflegum afgangi ríkissjóðs til þess að fara í þessi verkefni, samhliða því að greiða áfram niður skuldir ríksissjóðs.

Til þess að ná þessu þurfum við samhliða að efla samtalið og samvinnuna við fólkið á vettvangi og bæta þannig alla stefnumótun í þessum málaflokkum, ekki hvað síst í heilbrigðismálum

Forvarnir og bætt lýðheilsa

Fjölmargar rannsóknir staðfesta að skipulagt íþrótta- og æskulýðsstarf barna og unglinga dregur úr hvers konar frávikshegðun og hefur jákvæð áhrif á sjálfsmynd þeirra, heilsu og almenna líðan auk þess sem aukin hreyfing dregur úr sjúkdómum og hefur  jákvæð áhrif á skólastarf og vinnumarkað.  Við framsóknarmenn viljum endurgreiða virðisaukaskatt til viðhalds og uppbyggingar mannvirkja sem falla undir íþrótta- og æskulýðsstarf. Það er hluti af forvörnum á sviði heilbrigðismála, markmiðum um bætta lýðheilsu og dregur til lengri tíma úr álagi og kostnaði við heilbrigðiskerfið.

Við viljum taka þátt í félagshyggjustjórn þar sem bætt lýðheilsa, forvarnir, íþrótta- og æskulýðsstarf er meðal annarra brýnna mála í öndvegi.

Willum Þór Þórsson, skipar 1. sæti á lista Framsóknarflokksins í Suðvesturkjördæmi