Myndlistarmennirnir Hulda Hreindal Sigurðardóttir og Þórdís Ásgeirsdóttir úr Hafnarfirði sýna á Jónsmessugleði Grósku 2018
, sem er myndlistarsýning með listviðburðum við Strandstíginn í Sjálandshverfi, Garðabæ.

Sumarsólstöður nálgast og á morgun, fimmtudaginn 21. júní kl. 19.30-22, verður Jónsmessugleði Grósku haldin í tíunda sinn við Strandstíginn í Sjálandshverfi Garðabæjar. Jónsmessugleði Grósku á 10 ára afmæli og verða fjölbreytt listaverk til sýnis í töfrandi umhverfi ylstrandar með útsýni yfir hafið. Sýnendur eru tæplega 40 talsins og hafa sjaldan verið fleiri enda hafa gestalistamenn í boði Grósku flykkst hvaðanæva af landinu til að taka þátt í Jónsmessugleði. Meðal sýnenda eru hafnfirsku myndlistarmennirnir Hulda Hreindal Sigurðardóttir og Þórdís Ásgeirsdóttir úr Hafnarfirði en hafnfirskir listamenn hafa einnig lagt Grósku lið á fyrri árum.

Hulda Hreindal Sigurðardóttir.

Á Jónsmessugleði Grósku eru málverk á striga strengd milli staura og einnig innsetningar eða skúlptúrar. Fjölmargir aðrir listviðburðir verða líka á dagskrá, svo sem söngur, tónlist og ýmis konar glens og gaman. Ungir sem aldnir láta ljós sitt skína enda er Jónsmessugleði fyrir fólk á öllum aldri. Einnig býður Gróska upp á veitingar og búast má við fjörlegu kvöldi. Myndlistarmennirnir vinna nefnilega að þessu sinni með þemað: „Líf í tuskunum“. Að venju lýkur Jónsmessugleði Grósku svo með gjörningi kl. 22 sem vafalaust mun koma skemmtilega á óvart.

Gróska, félag myndlistarmanna í Garðabæ, stendur fyrir Jónsmessugleði í samstarfi við Garðabæ og hefur boðið myndlistarfélögum frá öðrum bæjarfélögum til leiks með sér. Einkunnarorð Jónsmessugleði Grósku eru: gefum, gleðjum og njótum og í þeim anda gefa allir listamennirnir vinnu sína þetta kvöld.
Jónsmessugleði er stærsta sýning Grósku og var haldin í fyrsta skipti árið 2009.  Gróska var í raun formlega stofnuð upp úr því. Síðan hefur Jónsmessugleði verið árviss viðburður sem hefur vaxið og dafnað með Grósku sjálfri og er áætlað að um 10 þúsund manns hafi mætt þegar fjölmennast var.
Allir eru velkomnir á Jónsmessugleði Grósku, Hafnfirðingar og Garðbæingar jafnt sem aðrir. Fólk er hvatt til að fjölmenna og gera einkunnarorð Jónsmessugleðinnar að sínum með því að gefa, gleðja og njóta.

Myndir aðsendar.