Ingi Tómasson, bæjarfulltrúi býður sig fram í prófkjöri Sjálfstæðisflokksins í Hafnarfirði sem fer fram þann 10. mars næstkomandi. Ingi sækist eftir 2. sæti á lista Sjálfstæðisflokksins í komandi sveitarstjórnarkosningum. Þetta kemur fram í fréttatilkynningu frá Inga.

Eiginkona Inga er Anna Pálsdóttir hárgreiðslumeistari og eiga þau tvö börn, Pál og Hjördísi Ýr.

Ingi er 64 ára menntaður húsasmiður og starfaði lengst af hjá slökkviliði varnarliðsins á Keflavíkurflugvelli jafnframt stofnaði og starfrækti hann Fjarðarplast sf. ásamt tengdaföður sínum í 16 ár samhliða starfi sínu í slökkviliðinu.

Ingi var virkur í félagsstarfi slökkviliðsmanna, seinni árin hefur hann einbeitt sér að málefnum Hafnarfjarðarbæjar og tekið virkan þátt í starfi Sjálfstæðisflokksins í Hafnarfirði þar sem hann var gjaldkeri á árunum 2007-2014.

Á árunum 2006-2014 gegndi Ingi mörgum trúnaðarstörfum fyrir Sjálfstæðisflokkinn í Hafnarfirði, var m.a. í hafnarstjórn, skipulags- og byggingarráði og umhverfis- og framkvæmdaráði. Hann skipaði 4. sæti á framboðslista Sjálfstæðisflokksins í Hafnarfirði í síðustu sveitarstjórnarkosningum, er formaður skipulags- og byggingarráðs og er í hafnarstjórn.

Áherslur Inga eru áframhaldandi ábyrg fjármálastjórn með lækkun skulda sem leiðir til enn betri þjónustu og lægri álögur á íbúa og fyrirtæki, umhverfis- og samgöngumál eru meðal þeirra mála sem Ingi leggur áherslu á en hann hefur m.a. beitt sér í úrbótum á Reykjanesbraut.

Ingi vonast til að sem flestir taki þátt og hafi áhrif í prófkjöri Sjálfstæðisflokksins.