Fyrstu helgina í desember hefjast jólin formlega í Hafnarfirði með opnun Jólaþorpsins og tendrun jólaljósa á Thorsplani. Litlu fagurlega skreyttu jólahúsin í Jólaþorpinu í Hafnarfirði eru orðin landsþekktur söluvettvangur fyrir ýmiskonar gjafavöru, handverk og hönnun sem tilvalið er að setja í jólapakkann ásamt gómsætu ljúfmeti til að borða á staðnum og eða taka með heim á veisluborðið. Jólaþorpið verður opið frá kl. 12-17 alla laugardaga og sunnudaga á aðventunni og stendur tendrunarhátíð yfir frá kl. 18 – 20 á föstudagskvöldið 30. nóvember.

Um helgina hefst jólaævintýrið í Jólaþorpinu á Thorsplani og mun Strandgatan í Hafnarfirði iða af mannlífi og sannkölluðum jólaanda og umbreytast í göngugötu á opnunartíma þorpsins. Jólasveinar koma auka ferð til byggða til að bregða á leik með börnunum. Jólaþorpið í Hafnarfirði fagnar nú í ár 15 ára afmæli með fjölbreyttri dagskrá þegar ljósin verða tendruð á Cuxhaven-jólatrénu á föstudagskvöld. Jólatréð er gjöf frá vinabænum Cuxhaven í Þýskalandi en í ár fagna vinabæirnir 30 ára samstarfsafmæli. Vinabæjarfélögin hafa verið drifkraftur í samstarfi og samvinnu á sviði atvinnulífs, menningar, íþrótta- og æskulýðs. Lúðrasveit Hafnarfjarðar og Karlakórinn Þrestir flytja nokkur jólalög og boðið verður uppá brot af því besta sem er á dagskrá í Bæjarbíó í desember þegar Friðrik Dór, Bubbi, Jóhanna Guðrún og Davíð Sigurgeirsson taka lagið.

Jólaútgáfan af Andra Ómarssyni. Þessi með grænu og rauðu húfuna.

Aukin áhersla á mat í Jólahúsum

„Í þessi 15 ár hefur Jólaþorpið stækkað að umfangi og með árunum náð að heilla landsmenn alla og í auknu mæli ferðamennina sem kjósa að sækja landið heim. Hafnfirðingar sjálfir eru líka farnir að nýta tækifærið og vettvanginn til heimboða á aðventunni. Þannig hópast heilu stórfjölskyldurnar og vinahóparnir í miðbæ Hafnarfjarðar, kíkja í búðir, á listasýningu, í litlu jólahúsin eða söfn bæjarins gagngert til að hafa það huggulegt á aðventunni,“ segir Andri Ómarsson, verkefnastjóri Jólaþorpsins í Hafnarfirði, en hann heldur utan um dagskrá og framkvæmd Jólaþorpsins í samstarfi við fjölda fyrirtækja, samtaka og einstaklinga. „Það skapast alltaf einstök og heimilisleg jólastemning í miðbæ Hafnarfjarðar á aðventunni. Hingað kemur fólk til að njóta, slaka og skemmta sér. Aukin áhersla var sett á það í ár að vera með mikið af mat þannig að allir gætu fundið eitthvað við sitt hæfi. Við munum m.a.  vera með lambakjöt beint frá býli í ýmsum útfærslum, geitaosta og hollustuvörur úr íslensku hráefni og matarhandverk sem frumkvöðlar hafa þróað og hágæða kaffi, te og kakó til að ylja sér á“ segir Andri. Jólaþorpið í Hafnarfirði verður sem fyrr segir opið alla laugardaga og sunnudaga frá kl. 12-17 á aðventunni.

 

Myndir: Hafnarfjörður og Olga Björt.