Hafnfirðingurinn Kristinn Óli Haraldsson, betur þekktur sem Króli úr rapp tvíeykinu Jói Pé og Króli, var valinn ræðumaður Íslands í Mælsku- og rökræðukeppni framhaldsskóla á Íslandi, Morfís.

Kristinn Óli er nemandi við Flensborgarskólann, sem att kappi við Verzlunarskóla Íslands í úrslitaviðureigninni í Háskólabíói í kvöld. Umræðuefnið var raunveruleikinn, þar sem Flensborgarskólinn mælti með honum en Verzlunarskólinn á móti. Svo fór að lokum að Verzlunarskólinn fór með sigur af hólmi. RÚV greinir frá.