Miðvikudaginn 14. mars næst komandi verður Skipulags- og byggingarráð Hafnarfjarðarbæjar með kynningarfund þar sem framtíðarsýn Hrauns-Vesturs verður kynnt. Fundurinn fer fram í Bæjarbíó kl 20:00 og eru allir sem eru áhugasamir um uppbyggingu og framtíð þessa svæðis hvattir til að koma og taka þannig þátt í mótun framtíðar þessa nýja andlits  Hafnarfjarðar.

Um er að ræða svæði sem afmarkast af Fjarðarhrauni, Reykjavíkurvegi og Flatahrauni sem hefur það að meginmarkmiði að þétta byggð á svæðinu og breyta landnotkun í blandaða byggð íbúða/atvinnustarfsemi.

Á hönnunarstiginu hefur hverfið fengið viðurnefnið „Fimm mínútna“ hverfið. Hugmyndin gengur út á að íbúar geti fengið flesta þjónustu í fimm mínútna göngufjarlægð frá miðju hverfisins. Í Hraun-Vestur mun kveða við nýjan tón í skipulagsmálum þar sem áhersla verður lögð á góða blöndun íbúabyggðar, þjónustu, létts iðnaðar, verslana, skóla-, dagvistunar- og frístundasvæða. Bílastæði og bílastæðahús verða undir byggðinni að miklu leyti og spennandi útfærslur eru á götumynd að nor-rænni fyrirmynd. Á sama tíma og aðgengi að almenningssamgöngum sér eins og best verður á kosið.

Hugmyndin að Hraun-Vestur hefur verið í þróun í nokkur ár en lengi hefur verið kallað eftir nýrri sýn á „framhlið“ Hafnarfjarðar.  Unnið hefur verið að þessum hugmyndum allt kjörtímabilið. En þar er leitast við að mæta kröfum nýrra kynslóða sem eru að fara að koma sér upp heimili en um leið spennandi kosti fyrir fólk sem er komið á þann stað í lífinu að vilja minnka við sig og hafa viðhald í lágmarki og vera í nálægð við miðbæjarþjónustustig.

Hraun-Vestur er ekki bara ný framtíðarsýn heldur er hverfið ef af verður nýtt glæsilegt andlit Hafnarfjarðar og þess vegna mikilvægt að sem flestir komið að mótun þessara hugmynda. Það eru allir velkomnir á kynningarfundinn á meðan húsrúm leyfir.

Myndirnar eru brot úr kynningu KRADS sem hannaði tillögunar sem kynntar verða í heild sinni á fundinum

Hægt er að skrá mætingu sína inn á Facebook síður Hafnarfjarðarbæjar