Adda María Jóhannsdóttir, oddviti Samfylkingarinnar í Hafnarfirði.

Í ljósi þeirrar stöðu sem upp er komin vegna ógildingar úrskurðarnefndar umhverfis- og auðlindamála á framkvæmdaleyfi vegna Lyklafellslínu 1 telur Samfylkingin í Hafnarfirði einsýnt að nú þegar verði hafist handa við undirbúning þess að leggja línurnar í jörð um þéttbýli í landi Hafnarfjarðar. Þetta kemur fram í fréttatilkynningu frá Samfylkingunni í Hafnarfirði varðandi Hamraneslínur.

Upphaflegur samningur við Landsnet um flutning línanna var undirritaður árið 2009 en samkvæmt honum átti flutningi þeirra að vera lokið árið 2017. Síðan þá hafa samningar verið endurnýjaðir í tvígang án þess að efndir hafi orðið.

Í ljósi þessa teljum við rétt að ráðist verði í framkvæmdir sem allra fyrst þar sem línurnar verði lagðar í jörð í gegnum Hafnarfjörð. Hagsmunir Hafnarfjarðarbæjar eru miklir enda ný íbúasvæði á Völlum og Skarðshlíð í næsta nágrenni. Með því að leggja línurnar í jörð næst íbúabyggð næðist sátt milli umhverfissjónarmiða og þeirri sjálfsögðu kröfu íbúa á Völlum og í Skarðshlíð að losna við háspennumannvirki úr bakgarðinum. Samfylkingin leggur áherslu á mikilvægi þess að Landsnet standi við gerða samninga og fjarlægi loftlínur umhverfis Hamranesvirki hið fyrsta og munum við setja lausn þessa stóra máls í algjöran forgang.

Samfylkingin í Hafnarfirði

Forsíðumynd: Olga Björt.