Leikritið Ubbi kóngur, sem Leikfélag Hafnarfjarðar sýndi á alþjóðlegu leiklistarhátíðinni Mondial du Théâtre í Mónakó, sló aldeilis í gegn og fékk þann heiðurssess að vera lokasýning hátíðarinnar. Verkið var sýnt 29. og 30. ágúst sl. í Théâtre Princesse Grace.

Leikfélag Hafnarfjarðar sýndi leikritið Ubba kóng á hátíðinni sem er haldin fjórða hvert ár á vegum International Association of Amateur Theatre og Studio de Monaco. Það þykir mikill heiður að vera boðin þátttaka í henni. 24 leikhópar er valdir til þátttöku hverju sinni og er þetta í þriðja sinn sem Íslendingum er boðið að sýna á hátíðinni, sem fagnaði 60 ára afmæli sínu að þessu sinni.

Fáránleiki forréttindastéttarinnar

Í dómi gagnrýnanda segir m.a. að leikstjórn Ágústu hafi verið einstaklega frumleg og margar kómískar lausnir nýttar til að skapa hughrif fyrir áhorfendur. Leikhópurinn hafi komið skilaboðum höfundar um fáránleika forréttindastéttarinnar fullkomlega á framfæri ásamt því að setja sinn eigin lit á sýninguna með þeirri blöndu af örlæti og bilun sem einkennir íslenska þjóð. Leikhópnum er þakkað það hugrekki að setja Ubba kóng upp á þennan hátt, í anda upprunalega verksins. Það sé vegna svona sýninga sem Mondial leiklistarhátíðin sé til auk þess sem þær viðhaldi þeirri sérstöðu áhugaleikhússins umfram atvinnuleikhús að koma sífellt á óvart.

Úr leikritinu um Ubba kóng. 

Tónlist og textar frá færustu skáldum

Leikfélagið frumsýndi Ubba kóng (Ubu roi) eftir Alfred Jarry í leikstjórn Ágústu Skúladóttur vorið 2015 og er þetta í annað sinn sem farið er út fyrir landsteinana með verkið. Leikarar eru 10, tónlistin er eftir Eyvind Karlsson og textar eftir Karl Ágúst Úlfsson og Þórarin Eldjárn. Ubba kóngi var tekið með kostum og kynjum og hlaust sýningunni sá heiður að vera lokasýning hátíðarinnar.

Félagar í leikfélaginu nýttu hvert tækifæri til að kynna bakgrunn sinn og menningu, m.a. í pallborðsumræðum. Á kynningarkvöldi var sungið fyrir gesti, víkingaklappið kennt og boðið upp á brennivín, harðfisk með smjöri og lakkrís. Hópurinn færði einnig gjafir að heiman og hefur vitinn í Hafnarfirði nú dreifst út um allan heim í barmi annarra þátttakenda.