Frá og með mánudeginum 12. júní geta íbúar og gestir í Hafnarfirði notið sín í sundi í Suðurbæjarlaug til kl. 22. Sumaropnun Suðurbæjarlaugar hefur tekið gildi og mun vera í gildi til og með 13. ágúst. Suðurbæjarlaug verður opin til kl. 22 alla virka daga og til kl. 21 á sunnudögum. Óbreyttur opnunartími verður á laugardögum.
Nýr opnunartími í Suðurbæjarlaug Hafnarfjarðar tekur gildi í dag. Frá deginum í dag, til og með 13.ágúst verður laugin opin frá kl. 6:30 – 22 á virkum dögum, 8-18 á laugardögum og 8-21 á sunnudögum. Undantekning verður um verslunarmannahelgina þegar laugin lokar kl. 17 sunnudaginn 6.ágúst en verður opin frá kl. 8-21 á frídegi verslunarmanna. Er hér um að ræða lið í tillögum íþrótta- og tómstundanefndar Hafnarfjarðar til fræðsluráðs Hafnarfjarðarbæjar að auknum opnunartíma í sundlaugum Hafnarfjarðar. Tillögur ráðsins ná líka til rauðra daga og voru sundlaugar Hafnarfjarðar nú í ár opnar á bæði Páskadag og Hvítasunnudag. Mjög góð aðsókn var í laugarnar þessa rauðu daga og er gert ráð fyrir að aukin sumaropnun leggist einnig vel í mannskapinn. Aukið aðgengi að sundlaugum er á meðal þess sem lögð er áhersla á í nýlegri Heilsustefnu Hafnarfjarðar og aðgerðaráætlun hennar.

(Mynd: Hafnarfjarðarbær)