Karlmaður fannst látinn í tjörn við Tónlistarskóla Hafnarfjarðar og Hafnarfjarðarkirkju á Strandgötu um hádegisbil í dag. Þetta staðfestir Sævar Guðmundsson, aðalvarðstjóri hjá lögreglunni á höfuðborgarsvæðinu, í samtali við Vísi, sem fyrstur greindi frá málinu. Ekki var hægt að veita upplýsingar um dánarorsök mannsins eða greina nánar frá tildrögum málsins að svo stöddu. Ekki er þó talið að neitt saknæmt hafi átt sér stað.

Fjölmennt lið lögreglu og annarra viðbragðsaðila var sent út þegar tilkynnt var um líkfundinn en aðgerðum er að mestu lokið á vettvangi. Stórt svæði í kringum tónlistarskólann og kirkjuna girt af og var almenningi meinaður aðgangur að staðnum.

Mynd: Hafnarfjarðarkirkja og Tónlistarskólinn í Hafnarfirði/OBÞ