Hafnarfjarðarbær blæs til sameinaðs málþings í næstu viku undir yfirskriftinni „Þjónusta við börn og ungmenni í Hafnarfirði“ en það fer fram í Hraunvallaskóla. Það eru tvö umfangsmestu svið sveitarfélagsins, fræðslu- og frístundaþjónusta og fjölskylduþjónustan sem standa sameiginlega að málþinginu en síðustu misseri hafa sviðin markvisst unnið að enn meira samstarfi í ýmsu málaflokkum sem snúa að börnum og unglingum og fjölskyldum þeirra með það í huga að geta veitt þeim betri þjónustu og fyrr en áður hefur þekkst.

Þó það sé ákveðinn rauður þráður í málþinginu er þó engu að síður um að ræða heildstæða og öfluga yfirlitsmynd af starfseminni og skora stjórnendur sveitarfélagsins á alla sem vilja láta sig þennan málaflokk varða að koma og sitja málþingið. Það er tímasett með þarfir vinnandi fólks í huga en það stendur frá 17:00 þriðjudaginn 17. apríl til 19:00 og fara kynningar og erindi fram á fimm stofum í Hraunvallaskóla.

Fyrir utan snemmtæka íhlutun sem kynnt var hér að ofan þá er fjöldi annarra erinda í boði sbr. erindi eins og „Kennsluráðgjöf fyrir tvítyngda nemendur“, „Hvað er í boði í sumar fyrir börn og unglinga?“, „Hvað gerir Barnavernd? Samstarf fjölskylduþjónustu og lögreglu í heimilisofbeldismálum“ og „Lestur er lífsins leikur – þróun og hverfaverkefni“ svo eitthvað sé nefnt. Þá kynna skólar ýmis sérverkefni á sviði forritunar og almennrar upplýsingastækni, heilsueflingu, félagsfærni og frístundir.

Aldrei áður hefur verið boðið uppá jafn yfirgripsmikla kynningu á vinnunni innan skóla og félagsþjónustu eins og á þessu málþingi í Hafnarfirði. Það má því segja að um einstakt tækifæri sé að ræða fyrir foreldra, forráðamenn og aðra uppalendur að kynna sér allt það fjölþætta starf  af meiri dýpt en áður hefur boðist.

DAGSKRÁ

Kl. 17.00              Opnun – Rósa Guðbjartsdóttir formaður fræðsluráðs Hafnarfjarðar

Kl. 17.10               Samstarf sviða fjölskylduþjónustu og fræðslu- og frístundaþjónustu (sviðsstjórar)

Kl. 17.20               Umræður og fyrirspurnir

17.40 – 19.00     Málstofur