Á fundi Bæjarstjórnar Hafnarfjarðar sem lauk í kvöld var lagður fram samstarfssáttmáli nýs meirihluta Bæjarstjórnar Hafnarfjarðar 2018 – 2022 og kosið í ráð og nefndir á vegum bæjarins. Ágúst Bjarni Garðarsson var kjörinn formaður bæjarráðs og Kristinn Andersen forseti bæjarstjórnar. Þá var Rósa Guðbjartsdóttir, fráfarandi formaður bæjarráðs, ráðin bæjarstjóri og kemur hún til starfa á morgun 21. júní.

Fulltrúar meirihlutans, vinstra megin. F.v. Helga Ingólfsdóttir, Ingi Tómasson, Ágúst Bjarni Garðarsson, Kristinn Andersen og Rósa Ingólfsdóttir. Næstur henni er svo lögmaðurinn Ívar Bragason.


Bæjarfulltrúar Sjálfstæðisflokksins og Framsóknar og óháðra hafa gert með sér sáttmála um myndum meirihluta bæjarstjórnar, sem ber yfirskriftina „Bætt þjónusta, betri bær“. Í sáttmálanum kemur fram að áhersla sé lögð „á málefni fjölskyldunnar, eldri borgara og skilvirka þjónustu í þágu íbúa og fyrirtækja.“ Hér má lesa sáttmálann í heild sinni.

Rósa Guðbjartsdóttir, bæjarstjóri Hafnarfjarðar, í ræðustól.

Rósa Guðbjartsdóttir nýr bæjarstjóri hlakkar til að takast á við þau verkefni sem framundan eru og líst vel á það meirihlutasamstarf sem nú er hafið. „Við sitjum hér í umboði bæjarbúa, markmið okkar eru skýr og við munum hefjast handa strax. Ætlunin er að efla skilvirkni sveitarfélagsins og bæta þjónustuna við bæjarbúa. Við ætlum að gera Hafnarfjörð enn betri.“

Fulltrúar minnihlutans, Adda María Jóhannsdóttir, Friðþjófur Helgi Karlsson, Jón Ingi Hákonarson, Guðlaug Kristjánsdóttir og Sigurður Þ. Ragnarsson.

Ágúst Bjarni Garðarsson formaður bæjarráðs tekur undir þetta með Rósu og bætir við „Við erum að boða ákveðna framtíðarsýn, hvernig við getum gert góðan bæ enn betri. Þar erum við að leggja áherslu á málefni barnafjölskyldna, eldri borgara og húsnæðismál. Það er meginstefið í þessum málefnasamningi milli flokkanna,“ segir Ágúst Bjarni.

Sjá nánari umfjöllun í næsta tölublaði Fjarðarpóstsins, 28. júní.

Myndir/OBÞ.