Laugardaginn 2. september næstkomandi verður boðið upp á opið hús í St. Jósefsspítala á milli kl. 13 og 15. Boðið verður upp á leiðsögn um húsnæðið og gestum gefst kostur á að koma á framfæri sínum hugmyndum um framtíð húsnæðisins. Hafnarfjarðarbær hefur eignast allt húsnæðið sem er 3.000 fermetrar og skuldbundið sig til að reka almannaþjónustu í húsinu a.m.k. næstu 15 árin. Þetta kemur fram í tilkynningu frá Hafnarfjarðarbæ.

Starfshópur um framtíð St. Jósefsspítala leggur mikla áherslu á að fá hugmyndir frá bæjarbúum og hefur verið opnuð netgátt þar sem hægt er að koma hugmyndum á framfæri við hópinn. Óskað er eftir hugmyndum einstaklinga, félagasamtaka og fyrirtækja um starfsemi sem myndi glæða þetta sögufræga hús lífi og vera Hafnfirðingum og gestum þeirra til sóma og gleði.

Hafnfirðingar og annað áhugafólk er hvatt til að koma á opna húsið og kynna sér þetta sögufræga hús og senda inn tillögur um framtíðarstarfsemi í húsinu. Það verður heitt á könnunni og ýmis fróðleikur. Gengið er inn um kapelluna.

Hér má senda inn hugmyndir til starshópsins. Farið er með allar hugmyndir sem trúnaðarmál ef óskað er eftir því. Starfshópurinn mun vinna úr innsendum tillögum auk annarra hugmynda og skila niðurstöðum sínum til bæjarráðs eigi síðar en 15. október næstkomandi.

Mynd frá Hafnarfjarðarbæ.