Hafnarfjarðarbær og Markaðsstofa Hafnarfjarðar stóðu fyrir vel heppnaðri ráðstefnu um stöðuna og tækifærin í ferðaþjónustunni í gær. Ráðstefnan fór fram í Hafnarborg og bar yfirskriftina „Stefna og staða Hafnarfjarðar í ferðaþjónustu“. Um eitt hundrað manns sóttu ráðstefnuna sem var hugsuð sem upphafsstef í framtíðarvinnu þar sem lögð verður áhersla á framtíðarsýn og stefnumörkun fyrir bæinn. Ekki einungis sem áfangastað fyrir erlenda gesti heldur einnig fyrir þá sem þar búa og reka fyrirtæki. 

Fagfólk bæði úr fræðigreinum og ferðaþjónustu voru með erindi og í framhaldinu voru áhugaverðar pallborðsumræður. Áherslan var á vörumerkjastefnur og ferðamálastefnur, hvernig þær eru unnar, hvernig þeim er framfylgt og aðgerðaráætlanir sem þeim þurfa að fylgja og hvernig unnið er með þær og þeim framfylgt.

Rauði þráðurinn í erindum frummælenda var tvíþættur. Annars vegar það að vörumerki eða mörkun sveitarfélags getur aldrei verið byggt á öðru en sannri upplifun gesta og íbúa hvers sveitarfélags eða áfangastaðar. Hins vegar að ferðaþjónustan verði að vaxa og dafna innan ramma sem reynir hvorki á þolmörk íbúa né náttúru. Það var í raun sameiginlegt stef þeirra sem héldu kynningar sama hvort þeir komu frá Reykjavík eða Skaftárhrepp.

Helgi S. Gunnarsson forstjóri Regins kynnti svo áform félagsins um að byggja 140 herbergja hótel við Strandgötuna, á reitnum fyrir aftan verslunarmiðstöðina Fjörð. Helgi kynnti teikningar af væntanlegri byggingu sem er teiknuð upp sem mörg minni hús frekar en eitt stórt til að falla betur inn í götumynd Strandgötunnar. Samkvæmt Helga leitar félagið ennþá að hentugum aðila til að reka hótel í byggingunni en sagðist finna fyrir miklum áhuga á framkvæmdinni og að Regin væri að undirbúa verkefnið af fullum þunga.

Fundarstjóri var Þór Bæring Ólafsson einn eigandi Gaman ferða og stjórnarmaður í Markaðsstofu Hafnarfjarðar. Ráðstefnan var opin öllum bæði fagaðilum og bæjarbúum með áhuga á greininni og sóttu hana um eitt hundrað gestir.

Meðfylgjandi eru myndir af ráðstefnunni annarsvegar af Helga S. Gunnarssyni hjá Regin, Síðan Haraldi S. Haraldssyni bæjarstjóra ásamt yfirlistmyndum af ráðstefnunni.

Myndir: Markaðsstofa Hafnarfjarðar.