„Við hjá Skólamat erum þakklát fyrir að fá aftur tækifæri til að bjóða nemendum í Hafnarfirði upp á skólamáltíðir og leggjum ríka áherslu á gott samstarf og umfram allt góðan mat,“ segir í tilkynningu til foreldra grunnskólabarna í Hafnarfirði. Eins og áður hefur komið fram slitu Hafnarfjarðarbær og ISS ehf samstarfi fyrr í mánuðinum.

Afgreiðsla skólamáltíða á vegum Skólamatar hefst miðvikudaginn 1. nóvember. Sérfæði vegna ofnæmis eða óþols er afgreitt gegn afhendingu læknisvottorðs. Mikilvægt er að skila þeim inn rafrænt eða í pósti eins fljótt og auðið er. Afgreiðsla sérfæðis hefst svo mánudaginn 6. nóvember. Á hverjum degi verður boðið upp á tvo rétti, hefðbundin rétt og svo léttari grænmetisrétt eða aðra fisktegund. Aukin áhersla er á rétti sem unnir eru frá grunni eftir einföldum uppskriftum, fjölbreytt útval grænmetis og ávaxta og fjölbreytt úrval fisktegunda.

Lágmörkun matarsóunar
Í tilkynningu kemur einnig fram að mikil áhersla verði lögð á lágmörkun matarsóunar, m.a. með vigtun á sorpi og skráningu, góðu eftirliti og fræðslu til nemenda. Verð skólamáltíða er ákveðið af sveitarfélagi, þ.e. verð fyrir hverja máltíð. Verð helst óbreytt kr. 463. Einungis er greitt fyrir mat þá daga sem skóli er skv. skóladagatali.

 

Myndir: Olga Björt og Skólamatur.