Viðurkenningar fyrir Snyrtileikann 2017 voru veittar við hátíðlega athöfn í Gróðrarstöðinni Þöll við Kaldárselsveg fyrir skömmu. 18 ábendingar bárust frá bæjarbúum varðandi fallegasta garðinn, fallegustu götuna eða stíginn og einnig bárust tilnefningar varðandi fallegar lóðir hjá félagasamtökum. Helga Ingólfsdóttir, formaður umhverfis- og framkvæmdaráðs og Berglind Guðmundsdóttir, landslagsarkitekt, afhentu viðurkenningarnar.

Helga Ingólfsdóttir og Berglind Guðmundsdóttir ásamt stoltum fulltrúum Golfklúbbsins Keilis. 

Allir viðurkenningarhafar fengu að velja sér plöntu til að gróðursetja í garðinum. 

 Fallegustu og snyrtilegustu garðarnir

Lindarberg 82, eigendur Hildur Ómarsdóttir og Pétur Pétursson. Mjög fallegur og snyrtilegur garður með gott úrval plantna. Eigandinn hefur þor og seiglu til að prufa nýjar og framandi tegundir og gefst ekki upp þótt móti blási heldur skiptir út og prufar eitthvað nýtt ef annað virkar ekki. Hér eru greinilega eigendur sem hafa áhuga á garðrækt.

Fjóluhlíð 12, Birna Guðmundsdóttir og Pétur Joensen. Hér eru garðáhugamenn á ferð, nokkur fjölbreytni í gróðri og búin að merkja fjölæringana sérstaklega í garðinum sem var skemmtilegt. Rúmgóðir pallar og snyrtimennska.

Lækjargata 12b, eigendur Ida Sveinsdóttir og Ríkharður Kristjánsson. Frábær garður og á sannarlega skilið viðurkenningu. Einstaklega fagur með mikla fjölbreytni í gróðri þar sem hugað er að hverju smáatriði. Frábært hvernig Hamarinn fær notið sín í þessum garði. Hér er mikill gróðuráhugi á ferð ásamt góðu viðhaldi. Þessi er sá flottasti!

Öldugata 6, eigandi Egill Strange. Mjög skemmtilegur bakgarður, ævintýragarður með allskonar dúlleríi haganlega fyrir komið. Útigrill, heitur pottur, rósabeð og skemmtilegt port þegar að húsi er komið þar sem maður getur fengið sér sæti og notið garðsins ef íbúar eru lengi að koma til dyra eða ekki heima.

Hafravellir 5, eigendur Bryndís Hulda Ríkharðsdóttir og Eiður Arnar Pálmason. Mjög snyrtilegur og fallegur garður á Völlunum þar sem hraunið hefur fengið að njóta sín. Snyrtimennska og fjölbreytni í gróðri.

Ölduslóð 9, eigendur Dagný Thorarensen og Steinþór Hlöðversson. Mjög snyrtilegur garður í grónu hverfi, hér hefur verið tekið rækilega í gegn og heildarmyndin er sannarlega falleg og garðurinn er samræmi við stíl hússins og þess tíma sem húsið var byggt.

 

Snyrtilegasta fjölbýlishúsalóðin.

Hraunvangur 1-3, eigandi Sjómannadagsráð. Mjög fallegar og snyrtilegar lóðir þar sem hraunið fær notið sín. Aðgengi er gott og notendavænt fyrir íbúa, góðar gönguleiðir og rými til að setjast nitur og njóta sólar og útsýnis.

Halfdan Herýsson, nýr formaður Sjómannadagsráðs, ásamt Helgu Ingólfsdóttur. 

Snyrtilegustu lóðirnar hjá félagasamtökum  

Golfklúbburinn Keilir. Virkilega falleg og snyrtileg aðkoma með vel hirtum gróðurbeðum og almennri snyrtimennsku. Hér hefur verið lagt mikið upp úr að hirða græn svæði umhverfis húsið vel og leyfa náttúrunni að njóta sín samhliða. Fjölbreytni í gróðri. Almennt er allur völlurinn vel hirtur og til mikillar fyrirmyndar.

St. Georgsgildið, skátaskálinn við Hvaleyarvatn, umsjónarmaður Guðni Gíslason.

Mikil snyrtimennska og alúð lögð við skálann og umhverfi hans. Skemmtilegar leikjaflatir i skóginum og yndislegt útsýni yfir Hvaleyarvatn. Þarna er allt á sínum stað.

Myndir: Olga Björt.