Kirkjukór Víðistaðakirkju hefur í haust æft verk fyrir tónleika í tilefni 500 ára siðbótarafmælis. Tvennir tónleikar verða í Víðistaðakirkju nk. laugardag kl. 16 og í Hljómahöll nk. sunnudaginn kl. 16:00. Í ár eru 500 ár liðin frá því að Martin Lúther negldi upp 95 greinar í Wittenberg sem markaði og upphaf siðbótarinnar.

 

Ásamt kór Víðistaðakirkju taka sex aðrir kirkjukórar þátt, frá Mosfellsbæ, Garðabæ, Álftanesi, Grindavík, Keflavík og Njarðvík eða um 120 manns. Tónleikarnir eru í samstarfi við Sinfóníuhljómsveit áhugamanna og stjórnandi er Oliver Kentish. Einsöngvarar eru Ragnheiður Gröndal, Gissur Páll Gissurarson og Bylgja Dís Gunnarsdóttir. Á tónleikunum verður fjölbreytt efnisskrá, m.a. frumflutt Lútherskantata eftir Eirík Árna Sigtryggson en höfundurinn fullyrðir að hún sé fyrsta sinnar tegundar. Verkið samanstendur af kórþáttum með samleik hljómsveitar og svo stuttum hljómsveitarþáttum á milli. Stíllinn er blanda af hefðbundnum kórsöng í sálmastíl, nútímalegum ómstreitum, dægurlagakenndum hljómum og rómantískum laglínum. Tónleikarnir eru í samstarfi við Sinfóníuhljómsveit áhugamanna, kirkjukóra og organista prófastsdæmisins.

Myndirnar tók Stefán Már Gunnlaugsson á æfingu í gær (24/10).