„Allir sem koma að þessu gefa vinnu sína. Þeir sem fá peningagjöf er yfirleitt fólk sem hefur verið að glíma við lífsógnandi sjúkdóma en við í samtökunum höfum verið að vinna með góðu fólki sem hjálpar okkur, segir Rútur Snorrason sem situr í stórn samtakanna Samferða sem stofnuð voru árið 2016. Samtökin standa fyrir tónleikum í Bæjarbíói 26. nóvember nk. 

Samtökin hafa m.a. unnið með Ragnheiði Davíðsdóttur hjá Krafti og Krabbameinsfélaginu, auk séra Vigfúss Bjarna Albertssonar hjá Barnaspítala Hringsins en hann er verndari samtakanna. „Við höfum verið að fá ábendingar frá þessu fólki og eins frá íslensku þjóðinni,“ segir Rútur, en hátt í tvöhundruð fjölskyldur hafa notið góðs af söfnuninni og hafa í allt safnast um 15 milljónir króna frá því samtökin voru stofnuð fyrir um ári síðan. Búið er að styrkja 36 fjölskyldur.

Vilja létta undir

Í stjórn Samferða sitja einnig Örvar Þór Guðmundsson, Hermann Hreiðarsson, Brynja Guðmundsóttir og Sigurlaug Ragnarsdóttir. „Þetta er fólk sem á lítinn sem engan pening og glímir einhver úr fjölskyldunni við krabbamein eða annan lífshættulegan sjúkdóm; fyrirvinnan er kannski dottin út af vinnumarkaðnum út af veikindunum. Tekjurnar hafa minnkað mikið og á móti er kominn hellings læknis- og lyfjakostnaður. Við björgum þessu fólki ekki en við gerum okkar besta til að létta aðeins undir.“

Tónleikar í lok nóvember

Framundan eru tónleikar þar sem allir listamenn munu gefa vinnu sína og ágóði rennur til þeirra sem minna mega sín. „Haldnir verða tónleikar í Vestmannaeyjum 11. nóvember þar sem Eyjamenn stíga á stokk og aðrir tónleikar verða haldnir í Hafnarfirði 26. nóvember og þá munu hafnfirskir listamenn koma fram. Við ætlum að reyna að halda svona tónleika víða um land svo sem á Akureyri og á Egilsstöðum. Það hefur aldrei skipt máli hvar fólk á heima og höfum við afhent fólki út um allt land þann pening sem hefur safnast síðastliðið ár.“

Allt fer á fullt í desember

Langtímamarkmið Samferða er að ávinna sér trú og traust fólksins í landinu og að geta glatt sem flesta. „Það er svo mikið af fólki þarna úti sem er að glíma við alls konar erfiðleika og veikindi. Við í stjórninni metum hverja umsókn fyrir sig á hverjum fundi en við komum saman í hverjum mánuði og styrkjum þá eina til fjórar fjölskyldur. Svo er allt sett á fullt í desember en þá verða þetta nokkrar tugir fjölskyldna sem við styrkjum. Við hringjum í fólk og sjáum síðan til þess að búið sé að millifæra pening inn á viðkomandi áður en samtalinu lýkur. Stjórnarmenn borga úr eigin vasa ef einhver kostnaður fellur til. Svo endurskoðar Deloitte allt bókhaldið og gerir það frítt.“

Hægt að vinna 200.000 króna vinning

Rútur segir að hann og aðrir sem tengist Samferða séu afar stolt af verkefinu. „Okkar framtíðarsýn er að  vonandi verður þetta eitthvað sem fleiri taka sér til fyrirmyndar.  Hægt er að finna okkur inni á Facebook síðu Samferða. Stracta Hotel gaf samtökum 200.000 króna gjafabréf sem einhver heppinn mun vinna seinna í nóvember sem líkar við síðuna. Við viljum auðvitað hafa alla þjóðina með okkur í þessu því við erum öll í þessu fyrir hana,“ segir Rútur.

Mynd: aðsend.