Laugardaginn 12. ágúst fer fram hin árlega gleðiganga Hinsegin daga. Hafnarfjarðarbær mun að sjálfsögðu taka þátt í göngunni í ár, líkt og fyrri ár og stendur undirbúningur nú yfir. Jafningjafræðslan Competo sér um skipulagningu göngunnar. Nánari upplýsingar um framkvæmd og fyrirkomulag göngu á vegum Hafnarfjarðarbæjar verða birtar á síðu Hinsegin daga í vikunni fyrir gleðigönguna.

Almennar upplýsingar um Gleðigönguna 2017 er að finna hér.

Gleðigangan er hápunktur Hinsegin daga. Í henni sameinast lesbíur, hommar, tví- og pankynhneigðir, trans fólk, intersex fólk og aðrir hinsegin einstaklingar í einum hópi ásamt fjölskyldum sínum og vinum til að staðfesta tilveru sína, sýnileika og gleði, ásamt því að minna á þau baráttumál sem skipta hvað mestu máli hverju sinni.

Hinsegin dagar skipuleggja gleðigönguna og stýra hvaða atriði fá aðgang að henni en atriðin sjálf eru sprottin úr grasrótinni. Einstaklingar og hópar geta skipulagt atriði og sótt um þátttöku í göngunni en Hinsegin dagar setja sem skilyrði að öll atriði miðli skýrum skilaboðum sem varða veruleika hinsegin fólks á einn eða annan hátt.